Ditambahan Peu

Dongéng Santri yasana Hadi Aks. Sumberna di dieu. Kieu dongéngna téh:

Aya santri keur diajar ngaji, ngaderes surat Al Qurés. Ngajina lancar, mahrojna bener. Ngan hiji nu salah waé téh nyaéta palebah ngucapkeun tungtung surat.. min khouf sok ditambahan baé ku peu.

“Wa amanahum min khouuuf…peu!” cenah. Atuh disentak ku Mama Ajengan.

“Jiihh.. ulah maké peu, Sujang!…Wa amanahum min khouuuf! Tah kitu! Sok balikan deui kainyah!” Ceuk Mama.

Pok deui budak téh. “Wa amanahum min khouuuuf… peu!” cenah, angger kawas tadi. Sababaraha balikan kitu baé.

Lila-lila mah si Mama jéngkéleun. Basa éta santri geus réngsé engab ngucapkeun min khouf, kep sungutna dibekem rada lila, ngarah teu ditambahan ku peu deui.

Naha atuh barang si Mama muka pangbekemna, kadéngé deui sora “Peu…” cenah! 😁😁

Wilujeng miéling poé santri nasional, Lur!